მე და ჩემი მეუღლე 2022 წლიდან ვმართავთ სახელოსნო ,,ჰარა”-ს, სადაც ვაწარმოებთ წითელი თიხის საყვავილე ქოთნებს, კერამიკულ პროდუქციას, ნივთებს ექსტერიერისა და ინტერიერისთვის. ყველა ნამუშევარს ხელით ვქმნით და ვხატავთ, რაც მას განსაკუთრებულ ხიბლს და უნიკალურობას სძენს. კვირის შვიდივე დღე თითქმის მთლიანად ამ საქმიანობას ეთმობა. ეს ჩვენი პირველი ერთობლივი წამოწყებაა, რომელიც უდიდეს სიხარულსა და კმაყოფილებას გვანიჭებს. თიხასთან მუშაობის პროცესში აღმოვაჩინეთ, რომ აქ არ არსებობს შეზღუდვები, ჩარჩოები - ხარ სრულიად თავისუფალი შენს შემოქმედებაში, გეძლევა საშუალება გამოხატო საკუთარი თავი. თიხა თერაპიული მედიუმია, თავისი ბუნებრიობიდან გამომდინარე, აერთიანებს ოთხივე ელემენტს: წყალს, ჰაერს, მიწას და ცეცხლს - მასთან ყოველდღიური კონტაქტი ჩვენთვის ძალიან თერაპიული და სიმშვიდის მომტანია. ყოველი ახალი ნივთის შექმნა ჩვენთვის არის ახალი ექსპერიმენტი და გარკვეული რისკიც, რაც ამ პროცესს კიდევ უფრო მიმზიდველს ხდის. მუშაობის პროცესი, ჩვენი ხასიათისა და განწყობის ცვლილებასთან ერთად იცვლება, ამიტომ ჩვენი ნაკეთობების დიზაინიც და ფორმაც მრავალფეროვანია, ვცდილობთ შევქმნათ ისეთი ნამუშევრები, რომლებიც იქნება ესთეტიკური, გამორჩეული, და რაც მთავარია, მაღალი ხარისხის.