„შეიფერე“ ხელნაკეთი ნაჭრის ჩანთების ახალი ქართული ბრენდია, რომელიც შეიქმნა 2019 წლის ზაფხულში მეგობრების მხარდაჭერით. ვფიქრობ, საინტერესო იქნება ისტორია, საიდან გაჩნდა ხელნაკეთი ნაჭრის ჩანთების შექმნის იდეა და როგორ დაერქვა ბრენდს სახელად „შეიფერე“: 2019 წლის გაზაფხულზე გადავწყვიტე, სახლში ფარდები გამომეცვალა, რადგან ერთი მხრიდან მზისგან იყო გახუნებული, თან სახლში უფრო ფერადოვნება და სიახლე მომინდა (ძველი ფარდები ნაცრისფერი ტილოს მატერიისგან იყო დამზადებული). გამოცვლილი ფარდების გადაყრა დამენანა, რადგან მეორე, შიდა მხარე სრულად ახალივით იყო. ამიტომ ვიფიქრე, ჩემთვისა და მეგობრებისთვის შემეკერა ნაჭრისგან ტევადი, კომფორტული, მხიარული, ფერადი და ლამაზი ჩანთები, რისთვისაც, ფონად გამოვიყენებდი ნაცრიფერ ტილოს მატერიას (ძველი ფარდის ნაჭერს) და გავახალისებდი ფერადი აპლიკაციებით. პირველ რიგში, უნდა მეყიდა საკერავი მანქანა და შემდგომ შევდგომოდი ამ „დიდ და რთულ“ საქმეს. დაახლოებით 2 თვის განმავლობაში ვკერავდი ჩემი დიდი სამეგობროსთვის ნაჭრის ჩანთებს... დროდადრო ვხუმრობდით, რომ ვიცვლიდი პროფესიას და ნაჭრის ჩანთების თერძად ვყალიბდებოდი. თერძობას „მსოფლიო ბაზარზე“ უნდა გავეყვანე, რომელიც უზრუნველი ცხოვრების გარანტი იქნებოდა... ამისთვის კი საჭირო იყო ბრენდის დაარსება, ბრენდისთვის სახელის დარქმევა (ე.წ. მონათვლა), ლოგოს მოფიქრება, ფეისბუქგვერდის შექმნა, ახალი და გასაყიდი ჩანთებისთვის სხვადასხვა მასალის შეძენა, თითოეული ჩანთის შექმნა და განფასება... ცოტა არ იყოს, ასე ხუმრობა-ხუმრობაში ისევ მეგობრებთან ერთად დაახლოებით 2-3 თვე დასჭირდა ამ ყველაფრის სისრულეში მოყვანას: მთავარი დაკვეთა იყო, რომ ლოგოშიც და სახელშიც გამოჩენილიყო მრავალფეროვნება, ფერადოვნება და ექსკლუზიურობა. ბრენდის სახელისთვის რამდენიმე ვარიანტი განიხილებოდა. საბოლოოდ, გამოკითხვის შედეგად შეირჩა ერთ-ერთი მეგობრის წამოძახილი „შეიფერე!“, რომელიც ჩემთვის სიტყვის თამაში იყო და მოიცავდა ფერებსაც, მხოლოდ შენთვის შქმნილსაც და ერთადერთსაც. მეორე მეგობარმა სახელი ლოგოდ აქცია და ფეისბუქგვერდიც შექმნა. მე კი პარალელურად ვმუშაობდი პირველ კოლექციაზე და 2019 წლის 8 აგვისტოს გამოჩნდა კიდეც „შეიფერეს“ პირველი ჩანთებიც... რაც მთავარია, ყოველი ჩანთა უნიკალურია და მხოლოდ ერთ ვარიანტად მზადდება!